मुंबई महाराष्ट्राचे क्रीडामंत्री माणिकराव कोकाटे यांच्या अडचणीत वाढ झाली आहे. शासकीय गृहनिर्माण घोटाळा प्रकरणी नाशिक जिल्हा सत्र न्यायालयाने बुधवारी त्यांना व त्यांचा भाऊ विजय कोकाटे यांना तत्काळ अटक करण्याचे वॉरंट जारी केले. जिल्हा सत्र न्यायालयाच्या या निर्णयाला स्थगिती मिळावी आणि माणिकराव कोकाटे व त्यांच्या भावांना अटकपूर्व जामीन मिळावा यासाठी कोकाटे यांच्या वकिलांनी मुंबई उच्च न्यायालयात याचिका दाखल केली आहे. कोकाटे यांच्यावर बनावट कागदपत्रे तयार करून सरकारी सवलतीच्या घरांचा गंडा घातल्याचा आरोप आहे.
या प्रकरणी मंगळवारी नाशिक जिल्हा सत्र न्यायालयाने कोकाटे यांना सुनावलेली दोन वर्षांची शिक्षा व दहा हजार रुपयांचा दंड दंडाधिकारी न्यायालयाने कायम ठेवत या निर्णयावर तातडीने कार्यवाही करण्याचे आदेश दिले होते. यानंतर माजी आमदार तुकाराम दिघोळे यांच्या कन्या अंजली दिघोळे राठोड यांच्या वकिलांनी बुधवारी जिल्हा सत्र न्यायालयात याचिका दाखल करून मंत्री कोकाटे यांच्या अटकेसाठी वॉरंट जारी करण्याची मागणी केली. या याचिकेवर सुनावणी करताना जिल्हा सत्र न्यायालयाने या प्रकरणातील माणिकराव कोकाटे व त्यांच्या भावाला तत्काळ अटक करण्याचे अटक वॉरंट बजावले आहे.
माणिकराव कोकाटे यांनी 1995 मध्ये सरकारी गृहनिर्माण योजनेंतर्गत गरजूंना घरे देण्यासाठी बनावट कागदपत्रे वापरून सदनिका घेतल्या होत्या. या प्रकरणाची तक्रार माजी मंत्री तुकाराम दिघोळे यांनी नाशिक दंडाधिकारी न्यायालयात केली. यानंतर न्यायालयाच्या आदेशानंतर माणिकराव कोकाटे यांच्यासह चौघांविरुद्ध सरकारवाडा पोलिस ठाण्यात गुन्हा दाखल करण्यात आला. याच प्रकरणात 20 फेब्रुवारी रोजी नाशिक दंडाधिकारी न्यायालयाने चारही आरोपींना दोन वर्षांचा कारावास आणि 10 हजार रुपये दंडाची शिक्षा सुनावली होती. तोच निर्णय मंगळवारी नाशिक जिल्हा न्यायालयाने कायम ठेवला असून आज त्याच निर्णयावर मंत्री कोकाटे यांच्यासह चार आरोपींविरुद्ध तत्काळ अटक वॉरंट जारी करण्यात आले आहे.