मुंबई महाराष्ट्रातील मुलुंड (पश्चिम) येथील एलबीएस रोडवर असलेल्या जॉन्सन अँड जॉन्सन कंपनीसमोर शनिवारी दुपारी बांधकाम सुरू असलेल्या मेट्रोच्या खांबाचा काही भाग कोसळून एकाचा मृत्यू झाला, तर तीन जण जखमी झाले. तिन्ही जखमींवर मुलुंड येथील उपासना रुग्णालयात उपचार सुरू आहेत.
याप्रकरणी मुलुंड पोलिस ठाण्यात गुन्हा दाखल करण्यात आला असून घटनेचा कसून तपास सुरू आहे. मुलुंडच्या पोलिस उपायुक्तांनी सांगितले की, आज दुपारी एलबीएस रोडवर असलेल्या जॉन्सन अँड जॉन्सन कंपनीसमोर बांधकाम सुरू असलेल्या मेट्रोच्या खांबाचा काही भाग एका वाहनावर पडला.
या अपघातात वाहनातून प्रवास करणारे चार जण जखमी झाले. चौघांनाही जवळच्या उपासना रुग्णालयात दाखल करण्यात आले, मात्र त्यातील एकाचा मृत्यू झाला. इतर तीन जणांवर उपासना रुग्णालयात उपचार सुरू आहेत. रामधन यादव असे मृताचे नाव असून जखमी राजकुमार इंद्रजीत यादव (४५) याची प्रकृती चिंताजनक आहे. महेंद्र प्रताव यादव (52) आणि दीपा रुहिया (40) यांची प्रकृती स्थिर आहे.
अपघाताची माहिती मिळताच भाजपचे स्थानिक आमदार मिहीर कोटेचा आणि मुंबईच्या महापौर रितू तावडे यांनी तातडीने घटनास्थळी पोहोचून घटनेची माहिती घेतली. यानंतर मिहीर कोटेचा म्हणाले की, कालच मेट्रोच्या खांबावर स्लॅब बसवण्यात आला होता. त्याच स्लॅबचा काही भाग आज पडला.
या घटनेबाबत त्यांनी मुख्यमंत्री देवेंद्र फडणवीस यांच्याशी चर्चा केली असून या घटनेची उच्चस्तरीय चौकशी करण्याचे आश्वासन मुख्यमंत्र्यांनी दिले आहे. या घटनेची चौकशी करून दोषींवर कठोर कारवाई करावी, असे मिहीर कोटेचा यांनी सांगितले. शुक्रवारी मेट्रोच्या स्लॅबवर गर्डर बसवण्यात आल्याचे स्थानिक नागरिकांनी सांगितले.
हा गर्डर बसवल्यानंतर काम योग्य पद्धतीने झाले नसल्याने आज दुपारी दोन वाहनांवर स्लॅबचा काही भाग पडला. अपघातानंतर एलबीएस रोडवरील वाहतूक काही काळ विस्कळीत झाली आणि आजूबाजूच्या परिसरातील नागरिकांची गर्दी झाली. अग्निशमन दलाचे पथक घटनास्थळी मेट्रोचा ढिगारा हटवण्याचे काम करत आहे.