मुंबई : महाराष्ट्राचे माजी उपमुख्यमंत्री अजित पवार यांच्या आकस्मिक निधनानंतर त्यांच्या पत्नी सुनेत्रा पवार यांनी राज्याच्या उपमुख्यमंत्रीपदाची शपथ घेतली. या पदावर पोहोचणाऱ्या त्या राज्यातील पहिल्या महिला आहेत.
सायंकाळी ५ वाजता राज्यपाल आचार्य देवव्रत यांनी सुनेत्रा पवार यांना उपमुख्यमंत्रीपदाची शपथ दिली. त्यांचे पती अजित पवार यांचे नुकतेच विमान अपघातात निधन झाले.
याशिवाय महायुतीचा घटक पक्ष राष्ट्रवादी काँग्रेसही आज आपल्या नव्या अध्यक्षाची निवड करू शकते. शनिवारी दुपारी २ वाजता दक्षिण मुंबईतील विधानभवनात झालेल्या बैठकीत सुनेत्रा पवार यांची एकमताने राष्ट्रवादी काँग्रेसच्या विधिमंडळ पक्षनेतेपदी निवड करण्यात आली.
राष्ट्रवादीचे ज्येष्ठ नेते छगन भुजबळ म्हणाले की, राष्ट्रवादी काँग्रेसमध्ये (शरद पवार गट) विलीनीकरणाचा अंतिम निर्णय सुनेत्रा पवारच घेतील. त्याचवेळी आमदार संग्राम जगताप यांनीही विलीनीकरणाबाबतचा निर्णय पक्षनेतृत्वाकडून घेतला जाईल, असे सांगितले. सुनेत्रा पवार यांच्या विधीमंडळ पक्षनेतेपदी निवड करण्यासंबंधीचे पत्र मुख्यमंत्री देवेंद्र फडणवीस यांच्याकडे सुपूर्द करणार असल्याचे राष्ट्रवादी काँग्रेसचे कार्याध्यक्ष प्रफुल्ल पटेल यांनी सांगितले. सुनेत्रा पवार उपमुख्यमंत्री झाल्यानंतर राष्ट्रवादी आणि महायुतीच्या भवितव्याबाबत राजकीय चर्चांना उधाण आले आहे.